清晨天氣晴朗，溫和的陽光滲透一片片不薄不厚的雲層，散射於大氣之中。迷人的晨曦映照一片緣草如茵的大地，正努力喚醒這片沉睡已久的天地。如果陽光能夠溶化我們之間的冰川，我希望這個世界永遠沒有日落。
「佔中在社會各階層引起了極大的迴響，在達到運動的預期目標之前，無底的政治漩渦已將全港市民捲入思想的泥潭。支持佔中與否，大家都對無謂的爭辯感到厭倦，對將來感到灰心。
無止境的爭論，不但無助化解僵局，而且令大家走得更遠，互相對立。這是一種固步自封的表現，一時的衝動與誤解更顯得自身的無知。不能各退一步，跳出井口，只會令自己感到痛苦難受。
跳出泥潭要大家覺醒，自己的城市自己拯救！」雲仔隨即發佈了帖子。
不久，他的手機響了一響。
「Messenger:滔哥傳送了1個訊息給您
你又做鍵盤戰士啦！寫得幾好！Add oil!」
「Thx la!」
雲仔完成家課後閱讀報章，看到天氣預測時對著窗外的山景冥想，喃喃自語:「星期日，天晴，24至26度......」
「滔哥，聽日你得唔得閒？」
「OK, what's up?」
「我想約你去行山」
「Great! 你想去邊？」
「聽講由流水響行去八仙嶺嘅山路有好多靚景睇，不如去新界東北？」
「好！搵埋鋒哥佢地。」
清晨天清氣朗，涼爽的秋風正在丘陵之間流動，帶來一股股新鮮的空氣。不斷被開發的效野土地正努力以自己的犧牲提醒我們，這些土地不再屬於我們。如果人們能感受到秋風的寒意，這片可愛的土地就有得救的希望。
「鋒哥，你今日帶咗幾多乾糧？」
「冇吔，有D蒸包。」
「係喎！滔哥，我地而加係鶴藪水塘，仲要行幾耐先到黃嶺？」
「睇下大家使唔使休息......你預大半粒鐘。」
對於從未到過黃嶺的雲仔，一看到有別於平日綠草如茵的山坡，放眼盡是青黃斑駁，隨風擺動的野草，就覺得有如身處法國南部的農村。
雲仔有感而發:「咁靚嘅風景，真係可以幫我地減壓！香港人應該多D嚟，冇謂成日淨係爭辯，唔識放鬆自己。」
「其實政府一直都係到誤導市民，強調非黑即白，非對即錯。政治本來就無分對錯㗎啦！搞到咁僵，唔肯讓步，結果冇人得益，又何必呢？」
言談之間，腳步聲與行山杖撐地的「督督」聲逐漸傳入滔哥等人的耳朵。
「Hi！你地要去邊？」一位身形健碩的中年男士友善地問道。
「去八仙嶺。」
「幾好，加油！」
他們走上一座小山丘不久，兩三位較少行山，體力透支的同伴隨即坐在石塊上休息。
「呼！」雲仔軟軟的攤在石頭上。
「你地係咪同校同學？」
「冇錯，全部同級，有幾個同班。」
鋒哥趁著他們交談之際，悄悄地從背包拿出一張鮮黃色字條，走進一條小徑，然後將它牢牢綁在一棵光禿禿的小樹上。
一把圓渾的聲音倏忽嚇得鋒哥六神無主:「你地果然好似我地當年咁......」原來是一位正值中年的運動員跟蹤他。
「請問......有咩事？」
「唔使驚！坐低先啦，我想同你傾下計。
八九年嗰陣，好多香港人都關心國家嘅發展，希望終有一日可以成為自由民主同快樂嘅國度。學運初期，大家都對未來感到樂觀，覺得領導人會順應民意，做應做嘅事。我當時得十七歲，就下定決心，得到父母嘅默許之後就趕去北京做義工，幫手運送物資。同大陸學生相處一排，就知道佢地真係一批忠誠嘅愛國者。
後來開始覺得有D唔妥，掙扎過好唔好再留低。我感覺到，自己正身處時代嘅轉捩點，一放棄就可能再冇機會爭取。正如點解運動員明知自己三十歲到就要退休，搵其他工做，但仍然堅持做職業運動員嘅道理。我地退休之後要讀番書，辛辛苦苦咁搵其他工做。老闆會覺得你淨係運動叻，讀書就讀唔成，請你之前都要三思再三思。不過，正正就係我地知道過咗二三十歲就唔會再有機會做職業運動員，先至願意花時間，精力係運動上。有D事情，唔好等錯失咗先嚟後悔。」
「咁又係，係香港呢個高度商業化嘅社會，有運動員願意犧牲咁多時間，唔求高薪厚職，為嘅就係香港嘅榮譽，用汗水團結香港人。你地真係好偉大！」
「又如何？香港09年東亞運靠十二碼贏日本，曾經有一段時間市民對足球充滿熱情，不過之後大家就冇再點理。如果冇重大政治事件，又有幾多香港人會留意，甚至關心政治？我敢寫包單，反佔中嘅人之中，超過一半都對政局唔理解，只不過因為自己個人利益受損，先至會大大聲聲咁反對運動。佢地唔知道，真正有目的，有目標嘅社會運動係會有所犧牲，況且，我地爭取嘅自由民主權利，對佢地都係利大於弊。佢地可以反對佔中，但係以運動引起政局混亂，社會不安嘅理由反對運動就唔合理。示威者企出嚟，就係要整頓呢個混亂嘅政局。」
「有陣時我地都想睇開D，但係作為學生，就已經要承受大人都覺得沉重嘅壓力，我覺得呢個政府真係好失敗！樹生得唔好，佢地可以賴天氣唔好，養份唔夠，而唔去諗下究竟問題係咪甶種樹嘅人引致！」
「唉......唔識自我檢討，仲要自毀長城，你話呢個社會，如果我地基層市民唔努力，仲有咩希望，有咩將來可言？」
