反毒 打破沉默2

「唔好意思，我唔係有心咁講。」

「鋒哥，講呢句說話嘅人應該係我。不過情況長此下去，會有更多人同自己嘅好友發生口角。但願大家唔好因為政見上嘅不同而發生爭執。」

「雲仔，等我問你一條問題:你有冇見過漆黑一片嘅維港？」

「冇。」

「香港係邁向公民社會嘅途中，遇到嘅難題，阻滯就好比夜晚。縱使政府一意孤行，有市民反對我地，支持示威者，戴黃絲帶嘅人仍然不屈不撓，以血肉之軀抵擋反對者嘅攻擊，就正如港九兩岸嘅燈光徹夜照亮維港一樣。漫長的黑夜過去，大家就可以迎接充滿朝氣嘅黎明。」

他們走向兩旁堆滿記者的龍和道，目睹警車與救護車穿梭往返。再過一陣子，二人回到夏愨道的天橋，準備離去。這晚，幾乎沒有衝突發生。

「今日我希望以輔導科老師嘅身份同大家討論呢幾日發生嘅事。

我知道呢幾日大家都會因為佔中而同朋友甚至屋企人發生爭執，但係冇論你支持定反對，最好都控制下自己嘅情緒，唔好因為電視，報紙嘅報導或者whatsapp收到嘅訊息而變得情緒激動。你地作為學生，應該識得明辨是非，唔會人云亦云。

佔中嘅示威者有佢地嘅理念，警察就奉命行事。誰對誰錯，真係好難講。大家應該多角度思考，唔好淨係諗自己支持嗰邊。

有咩想講，而加比時間大家講。」

「大家可能覺得示威者咁和平，警察竟然用催淚彈嚟對付佢地，係大錯特錯嘅行為，但係你地有冇諗過，何謂和平？唔通用雨遮打警察就好和平？當Facebook出現好多示威者自稱被警察打傷嘅相，大家有冇諗過警察都係人，都會受傷？你地鬧警察嘅時候，有冇顧及佢地仔女嘅感受？」

「我地都知警察實在好難做，要保持政治中立，公正執法，但係係咪為咗所謂嘅國家安全，就連國際法都可以唔使遵守？示威者攞遮，大多數都只係要抵擋胡椒噴霧嘅攻擊，只係有少數人比較衝動，真係有向警察攻擊嘅意圖。我係黃絲帶，但我都會承認示威者有做錯嘅地方，唔會一面倒咁支持示威者，批評警方。不過，示威者淨係想政府回應佢地嘅訴求，目的根本就唔係針對警方，咁點解警察仍然要放催淚彈？新界東北嘅村民用鐵馬撞向立法會大樓，行為仲比佔中激進，點解警察冇用催淚彈？我希望警察而加仲可以理性判斷事非，唔好上頭話乜就做乜，如果係咁嘅話同機械人有乜分別？」

「警察要維護香港法治，保障大多數市民的權益，有咩唔合理？為咗達到自己嘅政治目的而綁架民意，唔通就冇錯？我知有部份警察嘅情緒會比較激動，但唔代表成個警隊都做錯......咁講好唔公道！」

「我地示威者都唔想咁......無錯！警察的確係維護法治嘅重要角色，但係係任何時候都唔應該淪為政治工具，任人擺佈......呢個情況冇人想見到。」

......

就這樣，一堂班主任課劃上了句號。