「原諒我這一生不羈放縱愛自由，也會怕有一天會跌倒......」 手機鈴聲在擁擠的車廂內響起。雲仔隨即往褲袋伸手，掏出手機。
「Hi，鋒哥！你而家係邊？」
「雲仔，我而家係海富中心。」
「真係唔好意思，要你等多一陣。我而家已經係金鐘站月台，三分鐘後見！」
他隨著人群搭乘自動電梯，然後奔向A出口， 跑完一段樓梯後已汗流浹背，上氣不接下氣。
「兄弟，唔使咁急嘅！」
「鋒哥，我地就係對偏頗嘅電視台報導無眼睇，先至會嚟到呢到。宜家社會咁亂，電視臺嘅公信力都備受質疑，真係唔知未來社會會變成點......」
「唔好諗咁多住啦，都係快d行落街，用我地雪亮嘅眼睛睇清事情嘅真相。」
二人步向夏愨道，剛走進佔領區就凝住腳步，大概是因為受現場的熱情氣氛感動。
「香港人，終於行到呢一步。」
「民怨積得太深，一下子爆發出嚟，係咁㗎啦！」說著，他按了幾次快門。
「鋒哥，嚟到現場，點睇呢場公民抗命？」
「民主發展係一條荊棘滿途嘅路，市民有勇氣，為咗真理同社會公義一齊行，已經好難得！」
他們走過街道，仰望一幅幅正在迎風飄揚的海報，字字鏗鏘有力，句句撼動人心。在人群中穿插一番，總算來到早已被紙海淹浸的連儂牆。留下心聲後，二人往維港方向走。途中在添馬公園遇到熱鬧的人群，他們也走上前圍觀。
「你地呢班後生仔，做咩係到要搞亂香港？」原來是一位上了年紀的清潔女工與一群年輕人發生口角。
「對唔住，影響到你嘅工作，但係我地絕對唔係要挑起事端......」
「講極都唔明，就證明到你班打壞後生讀死書，冇鬼用！」
「請聽下我地解釋。民主係要大家一齊爭取，忍咗咁多年，唔可以坐以待......」
「中國政府都忍咗你地班滋事份子十幾年，唔單止用咁多社會資源，納稅人嘅血汗錢，而且仲要打亂其他市民嘅日常生活，社會嘅未來就會比你地摧毀！」說著大力推開載著清潔用具的車子，怒氣沖沖地離去。
雲仔與鋒哥在岸邊的木板平台上歇息一會。和緩的海風正在吹拂衣袖。
「都話咗......上面嘅洗腦政策令人咬牙切齒！」雲仔對著維港洩憤。
「咪住......後面有人。」鋒哥提醒雲仔要慎言。幾位操流利國語的旅客走近，眺望維港景色，不久後就離去。
「你唔係呀嘛？大陸人你都驚？況且佢地可能係臺灣旅客，使唔使咁細膽呀？」
「你話而加每幾多個大陸人，先有一個台灣人嚟香港旅遊？」
「就算係大陸人又如何？呢度係香港，左派建制派可以蠻橫無理，我地自己圍內講心底話就唔得？請你比我自己一個人冷靜下，唔該。」雲仔走到平台的角落，對著璀璨奪目的維港發呆。
沒有留言:
張貼留言