反毒 拯救危城3

雲仔起床時伸著懶腰，打著呵欠，左手慣性地拿起鬧鐘，發現時針的影子已經重疊在10字上。「噢！要快D刷牙啦！」
他趕往洗手間梳洗一番後，迅速更衣，提起輕便的背包，運動鞋也未穿好就衝出門去。
剛剛到達港鐵站，已經看見一群人整裝待發，似乎等人等得不耐煩。
此時，文灝，雲仔的鄰班同學，焦急地說：「你終於都到啦！頭先連續打幾次電話比你都唔聽？」
「唔好意思，手機靜音......」
不久，大軍已經到達目的地。
一人朗聲道：「開波啦！」
哨子聲一響，對方立刻將球回傳，擺出防守的陣勢。一分鐘過去了，他們還在後方互相傳球。
差點忘了向大家說，雲仔、文灝與謙仔（雲仔的同級同學）屬於同一支球隊，那是他們自組的球隊。
此時，對方打算從左路進攻，但被文灝截擊，頓時失去控球權。雲仔那方有幾位前鋒及中埸早就等得不耐煩，此時見文灝搶斷成功，二話不說立刻上前輔助。
一位身材高大的前鋒繞過對方三名後衛，豈料在射門之際雙腳交叉，絆倒了自己，並向前直跌。文灝跑上前來，球卻已被守門員沒收。他頓時感到十分沮喪，緩慢地走回中埸。
這一次，對方的踢法更加保守，似乎一旦有人前來搶球便立刻將球回傳至禁區。雲仔略覺不妥，走到禁區與守門員謙仔討論局勢。
「謙仔，佢地咁保守，好似想引我地全軍出動，跟著趁機令我地全軍覆沒......」
「你都覺得係呢，不過點都好，唯有見招拆招......死啦！」
話音未落，雲仔回頭一看，只見對方排山倒海的攻過來，文灝等人正在急起直追。
雲仔看清楚對方的進攻意圖，在對方傳球之際伸出右腳。
豈料對方看清楚雲仔的企圖，立時打消傳球的念頭，繼續向前進攻。
「弊！回防！」
那位前鋒以迅雷不及掩耳之勢，單刀破門。
「唉！」
上半場，雲仔的球隊失了三球。
「失咗三球，點追呀？」
「大家唔好咁灰，一埸友誼賽啫，友誼先係第一，勝負第二。」
文灝雙手托著下巴，嘆道:「雲仔，我地都明白呢個道理，不過半場輸三球都，難聽D講，幾樣衰下。」
謙仔將雲仔拉開，似乎有意與他私下談話。
雲仔拍了拍謙仔的肩膀，問道:「點呀？有咩想講？」
「你覺得頭先點解我地會輸三球？」
「好簡單，我地呢邊淨係掛住進攻，有難都唔回傳，全村人過哂去，得番我地兩個留低防守。」
「對面打法隱陣，伺機反擊，我地就一味攻，勝負的確高下立見。雲仔，你之前咪同我講過，上年十一月你同滔哥去過旺角佔領區嘅？你話嗰陣時見到示威者互相扶持，合作，仲識咗一位叫喬喬嘅女同學，係咪？佔領運動已經完咗超過兩個月，你又覺得當時同而加示威者嘅行為或者舉動有冇咩唔同？」
「分別係有嘅，例如話有D人係社交網站話想移民之類，更加多人分享一D惡搞政府高官嘅相，總之對政府越嚟越反感。」
謙仔喝了一口綠荼，然後說:「我就係擔心佔中支持者，示威者遲早會失去理性，記住係到講好啦！我地兩位同文灝都係支持佔中，所以人地會懷疑我地對同立場嘅人嘅評論,不過點都好都講比你聽先。我嘅愚見就係咁嘅，好多人強調「有圖有真相」，似乎揭發對方嘅醜態醜行成為一種社會風氣。唔計改圖嗰D，就算你真係影到所謂嘅真相，又如何？你睇到嘅只係冰山一角，自作聰明嘅人斷章取義，結果令更多人產生誤會，禍及無辜！假如有人影咗一張文灝搶斷成功嘅相，跟著話「他們苦戰良久，才能取得控球權」，其他唔係現場嘅人會點諗？佢地好可能話對方好勁，但事實係佢地死都唔進攻，唔代表佢地好勁，而我地係搶球之前又冇苦戰。我唔係話示威者偏離當初反政府嘅目的宗旨，如果唔係我都唔會繼續支持社運啦！我只係想講示威者可能因為一時嘅衝動，發放同埋分享圖片，多媒體檔案，加埋自己嘅文字，可能令其他人有心或者無意誤解成件事。一月嗰陣，香港青少年軍成立，好多黃絲帶之類嘅反政府人士不斷分享佢地操兵，宣誓嘅相片，加D惡搞文字，share出去，令人覺得政府用另類方法洗腦，解放軍插手本港事務，一國得番一制。一來，分享或者收到嘅人以為自己知道真相，但其實佢咁唔透明，得佢地自己先知真相。如果件事唔係佢地咁諗，普通市民會點睇？佢地可能會話:其實反政府人士曲解成件事，係有心定無意？如果有心，佢地係咪想散播恐懼感，利用市民大眾嘅情緒，製造輿論，獲取政治利益？示威者咁樣做落去反而可能失去民心。二來，而加D反政府人士可能失去耐性，亦即代表佢地可能失去理性。佔中嗰陣，埸運動進行得如火如余，佢地心諗:運動持續落去，遲早實迫到政府正面回應，有正面嘅作為。而加，佔中已經告一段落，政府做咗嘅嘢就係整咗份不知所謂嘅民情報告，堅持繼續推行落閘之後嘅政改，示威者覺得連僅餘嘅希望都幻滅，於是開始做激進嘅行為，例如衝擊立法會。多謝美聯社，路透社佢地影低香港人保持理性嘅一面，因為之後，唔知仲會唔會有帶著微笑嘅面容出現。」
「謙仔，你身為黃絲帶，都可以將大局睇得咁清，佩服！佩服！」
「我呢D愚見好多人都識啦，只不過做唔做咋嘛！」
「頭先我地一搶到球就發咗癲咁進攻，比我諗到一樣嘢。」
「雲仔，你有咩高見？」
「呢D唔係高見，你誇獎啦！開頭對方一直踢得好保守，抓住控球權唔放，我地呢邊有球員等得唔耐煩，一搶到球就眼中只有龍門，結果以失敗告終。政治封閉咗咁多年，我最擔心示威者唔夠冷靜，失去理性，被壓抑咗至少十幾二十年嘅不滿一下子爆發出嚟，就會好似頭先我地咁衰收尾。我知道咁講好易被人誤會幫政府講嘢，但其實我絕對冇咁嘅意思。臺灣嘅民運發展咗三十年，而加先有少少成就，香港仲未形成政黨政治，如果操之過急，真係可能衰收尾。我地要先培養好公民意識，避免出現咁多僵持嘅局面，條路先有得行落去。陣間下半場，就由我地做起，有耐性咁踢好場波，好唔好？」
「好！我地返過去啦！」
「各位，隊長有幾句想同大家講。」
「剛才我地嘅表現的確未如理想，平均每十五分鐘就失一球，最主要嘅原因係我地掛住進攻，打得太急，搞到後防空虛。凡事都要比D耐性。踢波要留意陣勢，唔可以比失敗嘅滋味蒙蔽雙眼，一味反攻。同樣地，爭取政改，我地唔可以太心急而失去當初嘅理性，要靈活變通，見招拆招。如果香港人比民粹主義影響，呢座城市嘅未來就會好危險。陣間大家要隨機應變，唔好全村人過哂去，咁就輸波都唔會後悔。當然，我地會贏嘅！」
一人站起身來問:「我地真係可以反敗為勝咩？」
雲仔笑著回答:「咁我問你，人大決定不可動搖，咁示威者又去佔中？唔試又知唔得？行啦！」
哨子聲一響，文灝二話不說，將球回傳至後場，確保對方不會迅速得球。一位防守中場將球傳至雲仔腳下，雲仔慢慢盤球，逐漸走近中場。突然，他大喊一聲:「文灝跑啊！」，起腳將球踢向右前方。
文灝需然不太明白雲仔的用意，卻也顧不得那麼多，蹬腳起跳，希望能將球接住。不過雲仔將球踢得很遠，對方的後衛也來不及將球截停，結果球滾出界。
謙仔跑出禁區，拉著雲仔，說道:「你頭先先同大家講要理性踢波，唔好衝動，而加將嗰波踢出界，算咩意思？」
「謙仔，唔好心急，好戲在後頭......」雲仔在暗暗竊笑。
時間只剩下四十四分鐘，究竟他們能否連追三球，板平比分，甚至反敗為勝？