上午六時五十分，雲仔坐在麥當勞的角落，伸著懶腰，然後拿出一枚五元硬幣，不住將它放在桌上轉動，似乎在打發時間。
五分鐘後，第一位他見到的人拖著沉重的腳步走來，移開椅子後隨即軟癱地坐下，竭力睜開已不自覺瞇成一線的雙眼。
「謙仔，以我所知你平時唔會咁夜訓㗎噃？做咩事呀？」
「多謝關心，我尋晚掛住做Econ書，搞到今日……唉！都係唔好提啦……」
五十八分，那位熱愛南韓文化的少年戴著耳機，笑容滿面的走過來，未等雲仔開口，他已搶先道：「好啊！我最鍾意嘅組合下個月嚟香港啦！」
距離七時正只剩下：十、九、八……
還有一人未到……
五、四、三……
此時，街角處冒出一個熟悉的人影，倏忽之間已跑至桌前，滿頭大汗的說：「唔好意思，遲咗一秒……」
「唔使急，最緊要快……既然而加我地四個已經到齊哂，今日我地嘅活動就正式開始啦！首先問大家一個問題，你地覺得點解我會約各位係呢到等呢？」
「大概係一齊食早餐掛？」
「部份正確啦！因為我地嘅第一站就係呢到！」
謙仔與文灝二人搔了搔頭，均摸不著頭腦，而滔哥點了點頭，已自猜到了幾分。
「滔哥麻煩你坐係到幫我地睇住，我地三個出去睇住要買咩餐先。」
「你地睇下，最近魚柳包貴咗一蚊，去到十蚊啦！以前仲賣緊九蚊嘅時候，我肚餓都會考慮買個食，而加價錢變咗雙位數，我都要諗過先。」
「咁又係……一杯麥旋風都可以買到兩三個麵包，但係跨國集團始終有佢嘅魅力，好難忍呀！」
「快餐係香港係可以橫行天下，不過我唔信佢地可以隻手遮天！」
他們四人在享用早餐的同時有說有笑，完全感覺不到計劃已經正式啟動。
「同大家講定，今日呢餐M記早餐大家要好好珍惜啦，因為……」
其他三人見到雲仔神情凝重，於是放下手中的食品，豎起耳朵，細心聆聽他的一言一語。
「因為我地計劃嘅第一步係對大集團進行杯葛！」
謙仔頓時失聲地叫了出來：「噢！我的天啊！」
「雲仔，你真係有信心可以做到？」
「其實唔怕同你地講，我係睇到有人將抵制財團嘅事跡寫成一本書，於是萌生咗呢個念頭。同埋，謙仔，你好似每星期先食麥當勞一次，使唔使咁激動呀？」
「Sorry，頭先係激動，我的確係難以抗拒大集團嘅誘惑，請你地繼續。」
「是咁的，今日我打算巡下附近社區，睇下有邊D集團我地可以杯葛一陣子，進一步嘅行動要再傾下。」
「雲仔，咁你想抵制幾耐？」
「冇確實諗過，因為都要試下我地可唔可以適應到，同埋效果大唔大，最好就堅持下，唔好輕言放棄，話哂呢道氣我地都忍咗好耐。」
「咁好啦……」文灝凝著他手中那剩下一半的魚柳包，不願多咬一口……
沒有留言:
張貼留言